Agenda

Argazki lehiaketarako gonbidapena

Murumendiko tontorra

Hamaiketakoa prestatu eta Murumendiko tontorrerantz abiatuko gara. Iturbe eta Iturburu baserrietara abiatuko gara. Hormigoizko pista jarraitu eta Malkorre ingurura iristean, garai bateko meategietako sarrerekin egingo dugu topo. Hemen, gorantz doan bidea hautatu eta basoan sartuko gara. Urkiara iritsi arte baso itxi honetatik mendian gora joango gara. Gure bidean Bekoetxeko erreka aurkituko dugu. Urkian indarrak hartu ondoren, ermitaren atzealdean dagoen bidea hartuko dugu, PR-GI54 jarraituz. Bidea Murumendiko tontorreraino ongi markatuta dagoenez, honi jarraitzea besterik ez dugu.

Lizardiko bira

Ibilbidea luzea baina erraza da eta bai oinez bai mendiko txirrinduaz disfrutatzeko aukera emango digu. Ibilbidean zehar naturarekin bat egiteko aukera paregabea. Behin Berostegi auzoko errepidea utzita, Lizardi errekatxoaren aztarna jarraituko dugu. Ibilbidearen izenak esaten duen bezala, bideko lizar ugariek itzala emango digute, hauekin batera pagoak, haritzak, gaztainondoak… bide lagunak ditugularik. Aipatzekoa da Lizardiko errota ikusteko zoragarria dela eta bidean zehar animali ugari ikusiko ditugula.

Ioiako bira

Basoetan zehar Ioiara eramango gaituen ibilaldi honetan hainbat baserri ikusgai izango ditugu. Eskola eta frontoi zaharraren artean dagoen pistan hasi eta Agarre baserritik igaro asfaltozko bidera iritsi arte. Hemen aurrez-aurre izango ditugu igo beharreko mendiko eskailerak. Ioia aldera doan errepidea goraka hartuko dugu, Izarreko bidegurutzera heldu arte. Izarre baserrira iristean, langa zeharkatu eta bidexkan dauden mugarriei jarraituko diegu Iraolaetxeberrira iritsi arte. Gorantz doan bidea hartuko dugu Artetxe baserriraino.

Orriak